«20 սմարթ կեդրոն կառուցելու համար անհրաժեշտ է 200 միլիոն տոլար: Կան մեծահարուստ հայեր, որոնց գրպանին համար սա մեծ գումար չէ, բայց այդ 200 միլիոնը կրնայ գիւղերու հայութեան փրկութիւնը ըլլալ»:
Հայաստանի մանուկներ հիմնադրամի (COAF) հիմնադիր եւ խորհուրդի ատենապետ, դոկտոր Կարօ Արմէնը ելոյթ ունեցած է «Փոխադարձ վստահութիւն, միասնականութիւն եւ պատասխանատուութիւն» խորագիրով Հայաստան-Սփիւռք համահայկական 6-րդ համաժողովի ընթացքին:
Անդրադառնալով Հիմնադրամի 13-ամեայ գործունէութեան` դոկտոր Արմէն նշած է, որ գիւղերուն մէջ COAF-ի գործունէութիւնն ինքնանպատակ չէ: Նկատելով, որ երեխաները շատ բարձր ունակութիւններ ունին, բայց չունին միջոցներ, Հիմնադրամը երեխաներուն համար մուտք ապահովեց այդ միջոցներուն: 44 գիւղի մէջ բարձր արդիւնաւէտութեամբ աշխատելով` այսօր Հայաստանի մանուկներ հիմնադրամը վերանայած է ռազմավարութիւնը. պէտք է գործը հասցնել Հայաստանի բոլոր 1000 գիւղեր:
Նպատակը մէկ է` արագացնել գիտելիքի փոխանցումն ու կրթութիւն ապահովել տարբեր ոլորտներու մէջ, որ թափ առնէ գիւղական համայնքներու յառաջընթացը:
«Նոր ձեւ մը ստեղծած ենք, որ կը կոչուի սմարթ: Աշխատասիրութիւնը բաւական չէ. պէտք է խելացի ձեւով աշխատինք: Հենց այդ նպատակով է, որ յառաջիկայ 10-15 տարուան ընթացքին Սմարթ կեդրոններու միջոցով բոլոր գիւղերը կ’ուզենք հասնիլ »:
Կարօ Արմէնը համոզուած է, որ ՍՄԱՐԹ նախաձեռնութիւնը կրնայ ըլլալ գիւղին մէջ աճող սերունդի փրկութիւնը: «Յաջողելու համար քանի մը բանի կարիք կայ. գումարը կարեւոր է: Բացի այդ, մենք պէտք է տարածենք աշխարհի մէջ բոլոր բնագաւառներու լաւագոյնը` կրթութիւն, ուսում, առողջապահութիւն եւ այլն: Ոչ միայն հայկական լաւագոյնը, այլեւ համաշխարհային: Սա է զարգացումը: Դիւրին գործ չէ, բայց հնարաւոր է»:
All the contents on this site are copyrighted ©. |